← Allar fréttir

Erasmus+ · 20. mars 2025

Inside Out: Máttur útináms

Inside Out: Exploring the Power of Outdoor Education

Verkfæri til inngildingar ungra innflytjenda sem hvorki eru í námi, starfi né þjálfun (NEET) á Íslandi, Írlandi og í Þýskalandi

Á undanförnum árum hafa áskoranir ungra innflytjenda sem hvorki eru í námi, starfi né þjálfun (NEET – Not in Education, Employment, or Training) vakið mikla athygli víða í Evrópu og undirstrikað brýna þörf fyrir nýstárlegar og inngildandi nálganir. Inside Out, verkefni styrkt af Erasmus+, brást við þessari þörf með samstarfi Tækifærisins á Íslandi, Culture Goes Europe í Þýskalandi og Eurobug International Youth Work and Training Collaboration Ltd (Eurobug Int) á Írlandi. Markmið verkefnisins var að styðja við aðlögun og persónulegan þroska ungra innflytjenda með því að nýta útinám sem verkfæri til félagslegrar inngildingar og valdeflingar.

Í ljósi þess hve miklir möguleikar felast í útinámi til að takast á við þessi viðfangsefni lagði Inside Out áherslu á að byggja upp mikilvæga lífsleikni, efla seiglu og bæta andlega líðan með námi í náttúrunni sem hvetur til samvinnu, ákvarðanatöku og samfélagsuppbyggingar. Gerð hefur verið lokaskýrsla sem fjallar um öll skref ferlisins, reynslusögur, helstu niðurstöður og tillögur. Við vonum að skýrslan nýtist sem fræðandi og valdeflandi efni fyrir öll þau sem vinna að aðlögun og stuðningi við unga innflytjendur með nýstárlegum aðferðum í menntun.

Inside Out — lokaskýrsla (SALTO-YOUTH Toolbox)

Fyrsti áfangi verkefnisins fólst í þarfagreiningu í hverju samstarfslandi til að kanna staðbundnar áskoranir og meta hvernig útinám nýtist best. Í greiningunni var beitt fjölbreyttum rannsóknaraðferðum: rýnihópum með ungum innflytjendum, viðtölum við æskulýðsstarfsfólk og þjálfara með sérþekkingu á útinámi og könnunum meðal þjónustuaðila á sviði aðlögunar og frjálsra félagasamtaka. Niðurstöðurnar, þar á meðal sértækar niðurstöður frá Íslandi, Írlandi og Þýskalandi, er að finna í 1., 2. og 3. kafla, og þær lögðu grunninn að næstu áföngum verkefnisins.

Í 4. kafla er yfirlit yfir þjálfunarnámskeiðið sem haldið var á Íslandi, alþjóðlegan viðburð þar sem æskulýðsstarfsfólk og annað fagfólk kannaði möguleika útináms og lærði að beita aðferðunum í sínu nærumhverfi. Í kjölfar þessarar gefandi reynslu var gerð heimildarmynd sem fangar sýn og hugleiðingar þátttakenda, eins og lýst er í 5. kafla. Eftir heimkomuna beittu þátttakendur aðferðunum sem kynntar voru á námskeiðinu, aðlöguðu þær að sínum aðstæðum og héldu viðburði í heimabyggð til að prófa og þróa nálganirnar áfram. Í 6. kafla er fjallað ítarlega um hvert þessara verkefna. Skýrslunni lýkur á samantekt helstu niðurstaðna og tillagna, með það að markmiði að þekkingin nái til sem flestra og hafi sem mest áhrif. Hér kynnum við niðurstöðurnar:

Ein mikilvægasta niðurstaða Inside Out er að náttúran er öllum aðgengileg. Náttúran er sameiginlegur vettvangur sem stendur öllum til boða, óháð tungumáli og menningu. Það gerir útinám að sveigjanlegri fyrirmynd að aðlögun innflytjenda sem auðvelt er að yfirfæra og getur náð til fjölbreyttra hópa á ólíkum svæðum. Með því að hvetja til hreyfingar, samvinnu og verklegs náms hjálpa náttúrutengd úrræði þátttakendum að tengjast sjálfum sér, hvert öðru og nýju samfélagi sínu, og byggja upp seiglu og sjálfstraust í hvetjandi umhverfi sem dregur úr streitu. Hversu auðvelt er að yfirfæra aðferðina undirstrikar gildi hennar fyrir aðlögun innflytjenda í ólíku menningarlegu samhengi.

Til framtíðar litið verður nauðsynlegt að þjálfa æskulýðsstarfsfólk, samfélagssálfræðinga, félagsráðgjafa og leiðtoga í nærsamfélaginu í þessari aðferðafræði svo að yfirfæra megi útinám með góðum árangri. Þetta fagfólk, sem stendur í fremstu víglínu í stuðningi við unga innflytjendur, þarf færni og verkfæri til að beita náttúrutengdum aðferðum á árangursríkan hátt í daglegu starfi. Með þessar aðferðir að vopni getur það byggt upp inngildandi og áhrifarík verkefni sem sniðin eru að þörfum hvers samfélags og aukið umfang og sjálfbærni útináms.

Einnig er brýn þörf á auknum stuðningi stofnana og viðurkenningu á útinámi sem raunhæfri leið til aðlögunar. Menntakerfið, sem leggur oft áherslu á nám í kennslustofu, getur haft mikinn ávinning af því að nýta náttúrutengdar aðferðir, ekki síst fyrir nemendur sem eiga erfitt uppdráttar í hefðbundnu námsumhverfi. Útinám stuðlar að reynslunámi og færniuppbyggingu við raunverulegar aðstæður og gerir ungum innflytjendum kleift að efla leiðtogahæfni, samskiptafærni og hæfni til að leysa vandamál, sem skiptir sköpum við aðlögun að nýju umhverfi.

Enn fremur hvetjum við þjónustuaðila og samtök sem vinna að aðlögun innflytjenda til að kanna möguleika útináms sem hluta af stuðningi sínum. Með því að fella útiverkefni inn í starf sitt geta þau betur mætt sérþörfum ungra innflytjenda og boðið þeim ekki aðeins leið til félagslegrar inngildingar heldur einnig sjálfbæra leið til að styðja við andlega og tilfinningalega heilsu þeirra.

Stefnumótandi samstarf við aðila sem bjóða upp á útinám í nærsamfélaginu, skóla og félagsmiðstöðvar getur hjálpað til við að yfirstíga hagnýtar hindranir, svo sem kostnað, samgöngur og aðgang að búnaði, og þannig gert nálgunina aðgengilegri.

Til framtíðar litið verða mikilvæg skref í átt að inngildandi, seigara og samheldnara samfélagi að yfirfæra þetta líkan á nýjar aðstæður og flétta það inn í menntakerfið og stuðningskerfi fyrir innflytjendur. Með því að festa náttúrutengd úrræði í sessi getum við tryggt að ungir innflytjendur sem hvorki eru í námi, starfi né þjálfun fái þann heildstæða stuðning sem þeir þurfa til að blómstra í nýju samfélagi.

Þetta verkefni (nr. 2023–1-IS01-KA210-YOU-000160096) er samfjármagnað af Evrópusambandinu í gegnum Erasmus+ áætlunina. Að verkefninu standa Culture Goes Europe e.V. frá Þýskalandi, Eurobug frá Írlandi og Tækifærið frá Íslandi.