Tækifærið fékk 600 þús. kr. styrk frá Styrktarsjóði geðheilbrigðis nú í nóvember 2024. Styrknum er ætlað að standa straum af jafningafræðslu og öðrum valkvæðum útgjöldum s.s. tómstundum á námskeiðum Tækifærisins. Við þökkum heilshugar fyrir okkar enda skiptir svona styrkur sköpum í starfi okkar.

Þann 14. nóvember var einn hópur að klára og framundan er atvinnuleit fyrir nokkur ungmenni. Svo verður vonandi haldið áfram á nýju ári - því Tækifærið gefur þátttakendum ótal tækifæri

Hér kemur skýrsla Margrétar Einarsdóttur félagsfræðing um spurningakönnun meðal þeirra 12 þátttakenda sem luku námskeiði Tækifærisins í lok febrúar sl. Níu svöruðu könnuninni sem ákveðið var að gera rúmum 3 mánuðum frá lokum námskeiðs til að fá mynd af atvinnustöðu á þeim tímapunkti.

Í samantekt skýrslunnar segir:

“Heilt yfir þá voru svarendur ánægðir með námskeiðið. Þegar þeir voru beðnir að meta það í heild sinni voru þeir þannig einróma um að námskeiðið hafi verið gott eða mjög gott og gáfu því meðaleinkunnina 4,9 af 5 mögulegum. …. Svarendur voru ánægðir með starfsfólkið, telja það hafa verið mjög styðjandi og að sá stuðningur sem var veittur við að finna launað starf hafi komið að góðu gagni. Eða eins og einn viðmælandi orðaði það: „Það besta var einstaklingsbundinn aðstoð við atvinnuleit“. Almennt voru svarendur einnig sáttir við þá fræðslu og ráðgjöf sem veitt var til að takast á við aðrar persónulegar áskoranir.

Góður stuðningur við atvinnuleit birtist líka í hlutfalli þeirra sem voru í vinnu 15 vikum eftir að námskeiðinu lauk en þá voru tveir þriðju hlutar svarenda í vinnu. Niðurstöðunum verður þó að taka með þeim fyrirvara að 3 af 12 þátttakendum á námskeiðinu svöruðu ekki matskönnuninni. Hlutfall þátttakenda sem voru í vinnu að þessum tíma liðnum er því á bilinu 50 - 75% eftir því hve atvinnustaða þeirra sem ekki svöruðu er. Allir þátttakendur voru hins vegar utan vinnumarkaðar og atvinnuhorfur þeirra ekki góðar þegar námskeiðið hófst.”

Skýrsluna má lesa hér

Inside Out er alþjóðlegt samstarfsverkefni Tækifærisins um útivistarþjálfun ungra innflytjenda. Innflytjendur og ráðgjafar þeirra frá Þýskalandi, Írlandi og Íslandi hafa verið í þjálfun hér á landi síðan 23. - 30. apríl. Þetta hefur verið alveg meiriháttar, veðrið dásamlegt og stemningin einstök. Fengum alþjóðlegan útivistargúru, Gerrit Onstein og íslenkan útivistarkennara Ingu Ævarsdóttur. Þá kom til okkar á netspjall okkar nýji doktor í útivistarfræðum Dr. Jakob Frímann Þorsteinsson. Við Hrönn systir tókum að okkur eldamennsku á Úlfljótsvatni og fengum einu sinni sundfrí á meðan fólk grillaði á eldi sem kveiktur var án hefðbundinna eldfæra. Já ég veit ekki hvað á að segja annað en takk #Erasmusplus og #Rannís fyrir að hafa trú á verkefninu. Því er ekki lokið þar sem við munum í haust kynna afrakstur vinnunnar, en áður en til útivistarinnar kom gerðum við skoðananakönnum í löndunum þremur, tókum ítarleg viðtöl við sérfræðinga og ræddum málið í við markhópinn í rýnihópum. Já þetta er alvöru og núna finnst mér að hver stund í öllum undirbúninginum og skriffinnkan hafi verið þess virði. Ég á bara eitt stórt 😉 enda hjálpaði til að hafa einn jákvæðan heavy metal búálf (sjáið mynd) og alla hina skemmtilegu karekteranna.Description goes here

Vá - loks á að endurvekja heimasíðu Tækifærisins - orkan fór í námskeiðshald og vinnutengingu þátttakenda. Myndin er tekin í heimsókn á Reðursafnið, sem var valið af þátttakendum, ekki af Björk sem þó flestir halda ;-).

Í samvinnu við Vinnumálastofnun hófu 17 þátttakendur starf með okkur um miðjan janúar en 5 helltust úr lestinni. Af þeim 12 sem kláruðu námskeið eru nú í byrjun apríl 8 komnir með vinnu og einn fór aftur til síns upprunalands. Nú er verið að leita að rétta tækifærinu fyrir þá sem eftir standa og erum við bjartsýn - það er staður og verkefni fyrir alla í samfélaginu.

Hér má nálgast rannsóknarskýrslu Tækifærisins sem er fyrsti hluti Inside Out, samstarfsverkefni okkar með Culture Goes Europe í Þýskalandi og Eurobug á Írlandi.

Kíkið á niðurstöður rýnihóps, rannsóknarviðtala og spurningarkönnunar

15. janúar 2024 hefst næsta námskeið Tækifærisins í samvinnu við Vinnumála-stofnun. Um er að ræða 6 vikna námskeið þar sem ungt atvinnulaust fólk af erlendum uppruna fær fræðslu um íslenskt samfélag og íslenskan vinnumarkað um leið og unnið er með persónulegar áskoranir þátttakenda bæði með einstaklingsvinnu og í hópstarfi.

Tækifærið mun 1. janúar 2024 flytja starf sitt til Hugarafls í Síðumúla 6. Við leigjum af Hugarafli bæði skrifstofu og viðtalsaðstöðu og stærra rými til hópstarfs. Okkur hlakkar til að vinna með þátttakendum í Hugarafli sem eiga það sameiginlegt með okkur að takast á við ýmsar áskoranir í lífinu sem sumar eru af geðrænum toga.

Vinnumálastofnun hefur ákveðið að semja við Starfstækifærið um 6 vikna námskeið Tækifærisins sem hefjast á í janúar 2024.